பிரித்தானிய பாதுகாப்பு அமைச்சர் பதவி விலகல் !

பாதுகாப்பு செலவினங்களுக்கான நிதி ஒதுக்கீடு தொடர்பான பல மாத கால சர்ச்சையைத் தொடர்ந்து, பிரித்தானிய பாதுகாப்பு அமைச்சர் ஜான் ஹீலி தனது பதவியை விட்டு அதிரடியாக விலகியுள்ளார்.அதிகரித்து வரும் சர்வதேச அச்சுறுத்தல்களிலிருந்து நாட்டைப் பாதுகாப்பதற்கேற்ற போதிய நிதியை ஒதுக்க பிரதமர் கெய்ர் ஸ்டார்மர் தவறிவிட்டார் என்று அவர் தனது பதவி விலகல் கடிதத்தில் குற்றம் சாட்டியுள்ளார்.முன்னர் பிரதமருக்கு விசுவாசமாக இருந்த ஜான் ஹீலியின் இந்த விலகலைத் தொடர்ந்து, இளநிலை பாதுகாப்பு அமைச்சர் அல் கார்ன்ஸும் தனது பதவியைத் துறந்துள்ளார்.

பாதுகாப்புச் செலவினங்களை அதிகரிப்பது தொடர்பாகப் பிரதமருடனும் நிதி அமைச்சருடனும் நீண்டநாட்களாக இழுபறி நீடித்ததால், பிரிட்டனின் பாதுகாப்பு முதலீட்டுத் திட்டம் பெருமளவில் தாமதமாகியிருந்தது.இந்தச் சூழலில், நாட்டின் பாதுகாப்புத் தேவைகளை நிறைவேற்றப் பிரதமராலும் நிதி அமைச்சகத்தாலும் இயலவில்லை என்று ஹீலி தெரிவித்துள்ளார்.இந்த அதிரடி பதவி விலகல்களை தொடர்ந்து, பாதுகாப்பு அமைச்சராக டான் ஜார்விஸ் என்பவரைப் பிரதமர் ஸ்டார்மர் உடனடியாக நியமித்துள்ளார்.

எனினும், கடந்த மாதம் சுகாதார அமைச்சர் வெஸ் ஸ்ட்ரீட்டிங் பதவி விலகியிருந்த நிலையில், தற்போது பாதுகாப்புத் துறையிலும் ஏற்பட்டுள்ள இந்த அடுத்தடுத்த விலகல்கள் பிரதமர் ஸ்டார்மரின் தலைமைத்துவத்திற்குப் பெரும் நெருக்கடியை ஏற்படுத்தியுள்ளன.பொருளாதாரத் தேக்கம் மற்றும் அதிகரித்து வரும் கடன் சுமைக்கு மத்தியில், பாதுகாப்புச் செலவினங்களை நாட்டின் ஒட்டுமொத்த உற்பத்தியில் மூன்று வீதமாக உயர்த்துவதாகப் பிரதமர் உறுதியளித்திருந்த போதிலும், நடைமுறையில் அதற்கான நிதியை வழங்க அரசாங்கம் தவறிவிட்டதாக ராணுவ உயரதிகாரிகள் மற்றும் பாதுகாப்புத் துறையினர் அதிருப்தி வெளியிட்டுள்ளனர்.நேட்டோ உச்சிமாநாட்டிற்குச் சில வாரங்களே உள்ள நிலையில், பாதுகாப்பு அமைச்சரின் இந்த விலகலானது பிரிட்டன் அரசியலிலும் சர்வதேச அளவிலும் பெரும் பரபரப்பை ஏற்படுத்தியுள்ளது.