ஹார்முஸ் ஜலசந்தியை மீண்டும் மூடியதாக ஈரான் அறிவிப்பு – உலகளவில் எரிபொருள் விலை உயர்வு அபாயம்

டெஹ்ரான்: உலகின் மிக முக்கியமான எண்ணெய் போக்குவரத்து வழித்தடங்களில் ஒன்றான ஹார்முஸ் ஜலசந்தியை மீண்டும் மூடுவதாக ஈரான் அறிவித்துள்ளது. அமெரிக்கா மற்றும் அதன் கூட்டணி நாடுகளுடனான பதற்றம் தீவிரமடைந்துள்ள நிலையில் இந்த நடவடிக்கை எடுக்கப்பட்டுள்ளதாக ஈரான் தெரிவித்துள்ளது.உலகின் கடல் வழி கச்சா எண்ணெய் ஏற்றுமதியில் சுமார் ஐந்தில் ஒரு பங்கு ஹார்முஸ் ஜலசந்தி வழியாக நடைபெறுவதால், இந்த அறிவிப்பு சர்வதேச எரிசக்தி சந்தையில் பெரும் அதிர்வலைகளை ஏற்படுத்தியுள்ளது. எண்ணெய் மற்றும் இயற்கை எரிவாயு விநியோகத்தில் பாதிப்பு ஏற்படலாம் என்ற அச்சத்தால் சர்வதேச சந்தையில் கச்சா எண்ணெய் விலை உயரத் தொடங்கியுள்ளது.

இதன் தாக்கமாக பல நாடுகள் தங்களின் எரிபொருள் கையிருப்பை பாதுகாக்க அவசர நடவடிக்கைகளை மேற்கொண்டு வருகின்றன. பெட்ரோல், டீசல் மற்றும் சமையல் எரிவாயு விநியோகத்தில் தற்காலிக சிக்கல்கள் உருவாகும் அபாயம் இருப்பதாக பொருளாதார நிபுணர்கள் எச்சரித்துள்ளனர்.இந்நிலையில், ஈரான் ஜலசந்தியை மூடியதாக அறிவித்தாலும், அமெரிக்கா அந்த வழித்தடத்தில் கப்பல் போக்குவரத்து தொடர்ந்து நடைபெற்று வருவதாக தெரிவித்துள்ளது. எனவே, ஹார்முஸ் ஜலசந்தியின் நிலைமை குறித்து இரு தரப்பும் முரண்பட்ட தகவல்களை வெளியிட்டு வருகின்றன.மத்திய கிழக்கில் நீடித்து வரும் பதற்றம் காரணமாக உலகளாவிய எரிபொருள் சந்தை, கடல் வர்த்தகம் மற்றும் சர்வதேச பொருளாதாரம் மீது குறிப்பிடத்தக்க தாக்கம் ஏற்படக்கூடும் என ஆய்வாளர்கள் எச்சரிக்கை விடுத்துள்ளனர்.