FIFA உலகக்கோப்பைக்குப் பின் சர்வதேச கால்பந்தில் இருந்து நெய்மர் ஓய்வு; பிரேசில் ரசிகர்கள் அதிர்ச்சி

FIFA உலகக்கோப்பை தொடரில் பிரேசில் அணி நார்வேயிடம் அதிர்ச்சி தோல்வியடைந்து வெளியேறியதைத் தொடர்ந்து, நட்சத்திர வீரர் நெய்மர் ஜூனியர் சர்வதேச கால்பந்துப் போட்டிகளில் இருந்து ஓய்வு பெறுவதாக அறிவித்துள்ளார்.கனடா, அமெரிக்கா மற்றும் மெக்ஸிகோ இணைந்து நடத்தி வரும் FIFA உலகக்கோப்பை தொடரின் 16-ஆவது சுற்றில், நார்வே அணியிடம் 2-1 என்ற கோல் கணக்கில் பிரேசில் தோல்வியடைந்து தொடரிலிருந்து வெளியேறியது.

காயம் காரணமாக உலகக்கோப்பையின் தொடக்கப் போட்டிகளைத் தவறவிட்ட நெய்மர், உடற்தகுதியை மீட்ட பிறகு மாற்று வீரராக களமிறக்கப்பட்டார். ஸ்காட்லாந்து மற்றும் நார்வே அணிகளுக்கு எதிரான போட்டிகளில் அவர் விளையாடியதுடன், நார்வேக்கு எதிரான ஆட்டத்தில் கடைசி நிமிடத்தில் பெனால்டி வாயிலாக ஒரு கோலையும் பதிவு செய்தார். எனினும், அந்த கோல் பிரேசிலை தோல்வியிலிருந்து காப்பாற்ற போதுமானதாக அமையவில்லை.

இந்த தோல்விக்குப் பின்னர், 34 வயதான நெய்மர், 16 ஆண்டுகளாக நீடித்த தனது சர்வதேச கால்பந்து பயணத்திற்கு முற்றுப்புள்ளி வைப்பதாக அறிவித்தார்.இதுகுறித்து உணர்ச்சிவசப்பட்டு பேசிய அவர், “என்னால் முடிந்த அனைத்தையும் நான் செய்தேன். 2010ஆம் ஆண்டு அமெரிக்காவின் மெட்லைஃப் மைதானத்தில் பிரேசிலுக்காக எனது முதல் சர்வதேச போட்டியில் விளையாடினேன். இன்று அதே மைதானத்தில்தான் எனது சர்வதேச பயணம் நிறைவடைகிறது. எல்லாம் முடிந்துவிட்டது,” என்று தெரிவித்தார்.

பிரேசில் தேசிய அணிக்காக அதிக கோல்கள் அடித்த வீரர் என்ற சாதனையைப் படைத்துள்ள நெய்மர், கால்பந்து ஜாம்பவான் பீலேயின் சாதனையை முறியடித்தவர். பிரேசிலுக்காக சுமார் 130 சர்வதேசப் போட்டிகளில் விளையாடிய அவர், 80 கோல்களைப் பதிவு செய்ததுடன், 59 கோல்களுக்கு உதவியும் வழங்கியுள்ளார்.மேலும், 2013ஆம் ஆண்டு FIFA கான்ஃபெடரேஷன்ஸ் கோப்பையையும், 2016 ரியோ ஒலிம்பிக்கில் பிரேசிலின் முதல் கால்பந்து தங்கப் பதக்கத்தையும் வெல்வதில் நெய்மர் முக்கிய பங்காற்றியிருந்தார்.

சர்வதேச கால்பந்திலிருந்து மட்டுமே ஓய்வு பெற்றுள்ள நெய்மர், கிளப் கால்பந்தில் தொடர்ந்து விளையாடவுள்ளார். தற்போது அவர் பிரேசிலின் பாரம்பரிய கிளப்பான சாண்டோஸ் எஃப்சிக்காக விளையாடி வருகிறார்.நெய்மரின் சர்வதேச ஓய்வு அறிவிப்பு பிரேசில் ரசிகர்களுக்கு ஏமாற்றத்தை ஏற்படுத்தியுள்ள போதிலும், கிளப் கால்பந்தில் அவரது ஆட்டத்தை தொடர்ந்து காணும் வாய்ப்பு ரசிகர்களுக்கு ஆறுதலாக அமைந்துள்ளது.