கொழும்பில் ஆடிவேல் வெள்ளி ரத பவனி இன்று; மாற்று வழிகளை பயன்படுத்துமாறு போலீசார் அறிவிப்பு

கொழும்பு புறக்கோட்டை பழைய கதிரேசன் கோவில் மற்றும் பம்பலப்பிட்டி புதிய கதிரேசன் கோவிலின் 152-வது ஆண்டு ஆடிவேல் வெள்ளி ரத பவனி இன்று (28) நடைபெறுகிறது. இதையொட்டி, ரத பவனி செல்லும் பாதைகளில் போக்குவரத்து நெரிசல் ஏற்படக்கூடும் என்பதால், வாகன ஓட்டிகளும் பொதுமக்களும் மாற்று வழிகளை பயன்படுத்துமாறு போலீசார் அறிவுறுத்தியுள்ளனர்.

இன்று காலை 7.30 மணிக்கு புறக்கோட்டை கடற்கரை வீதியில் உள்ள கதிரேசன் கோவிலில் இருந்து புறப்படும் ரத பவனி, செட்டியார் தெரு, ஐந்து லாம்பு சந்தி, பிரதான வீதி, மணிக்கூட்டு கோபுரம் சந்தி, லைடன் பெஸ்டியன் வீதி, யோர்க் வீதி, பரன் ஜயதிலக்க மாவத்தை, ஜனாதிபதி மாவத்தை, காலி முகத்திடல் மற்றும் காலி வீதி வழியாக பம்பலப்பிட்டி புதிய கதிரேசன் கோவிலை இரவு 8.30 மணியளவில் சென்றடையும் என எதிர்பார்க்கப்படுகிறது.

மாலை 5.00 மணி முதல் இரவு 7.00 மணி வரை கொள்ளுப்பிட்டி மற்றும் பம்பலப்பிட்டி பகுதிகளில் காலி வீதியில் ரத பவனி நடைபெறவுள்ளதால், அந்த நேரத்தில் போக்குவரத்து பாதிக்கப்படலாம் என்றும் போலீசார் தெரிவித்துள்ளனர்.

இதனையடுத்து, ஜூலை 31-ஆம் தேதி காலை 8.00 மணிக்கு பம்பலப்பிட்டி புதிய கதிரேசன் கோவிலில் இருந்து திரும்பும் ரத பவனி புறக்கோட்டை கதிரேசன் கோவிலை நோக்கி பயணித்து, நள்ளிரவு 12.30 மணியளவில் நிறைவடையும் எனவும் தெரிவிக்கப்பட்டுள்ளது.

எனவே, ரத பவனி நடைபெறும் நேரங்களில் சம்பந்தப்பட்ட வீதிகளில் தேவையற்ற பயணங்களைத் தவிர்த்து, மாற்று பாதைகளை பயன்படுத்துமாறு பொதுமக்களிடம் போலீசார் கேட்டுக்கொண்டுள்ளனர்.